قىزىق نوقتا خەۋەرلىرى

   نېمە ئىش بىلەن ئالدىراش ئۆتۈۋاتىسىز؟

2017-08-03 18:05:27     مەنبەسى: شىنجاڭ خەلق رادىيو ئىستانسىسى   

            ئەكبەر ئىسمائىل

يېقىندا، «ۋاقىتنى باشقۇرۇش» توغرىسىدا يېزىلغان بىر پارچە ماقالىنى ئوقۇدۇم. ماقالىدىكى كۆز قاراش بويىچە كۈندىلىك تۇرمۇشىمىزدا ئۇچرايدىغان ئىشلارنى تۆت تۈرگە ئايرىشقا بولىدىكەن، يەنى، جىددىي ھەم مۇھىم ئىش؛ جىددىيمۇ ئەمەس، مۇھىممۇ ئەمەس ئىش؛ جىددىي، ئەمما مۇھىم ئەمەس ئىش؛ مۇھىم، ئەمما جىددىي ئەمەس ئىش.
ماقالىنى ئوقۇپ بولغاندىن كېيىن، تۇرمۇشۇمدىكى كۈندىلىك ئىشلارنى بۇ تۆت تۈرگە تەتبىقلاپ باقتىم، ھەقىقەتەن، خىيالىمغا كەلتۈرەلىگەن ھەممە ئىش بۇ تۆت تۈردىن چەتنەپ كەتمىدى. ئەگەر تۇرمۇشىمىزدىكى ئىشلارنى بۇ تۆت تۈر بويىچە خۇلاسىلەپ، ئىشنى ياخشى ئورۇنلاشتۇرالىساق، تۇرمۇشىمىزغا راستتىنلا كۆپ مەنالارنى بېرەلەيدىكەنمىز.
ئالىي مەكتەپتە ئوقۇۋاتقاندا، پاراللېل سىنىپتا ئوقۇيدىغان بىر تونۇشۇم بار ئىدى، ئۇنىڭ ھەر زامان ئالدىراش يۈرگەنلىكىنىلا كۆرەتتىم. ئۇ دائىم كۇتۇپخانىغا ئالدىراش كىرەتتى، لېكىن ئون مىنۇت ئولتۇرمايلا، نەرسىلىرىنى جىددىي يىغىشتۇرۇپلا، چىقىپ كېتەتتى؛ مەيدانغا توپ ئوينىغىلى كېلەتتى، ئەمما ئون مىنۇت ئۆتمەي، «ئۆگىنىشكە بارىمەن» دەپ كېتىپ قالاتتى؛ كەچلىك مۇزاكىرىدە سىنىپقا جىددىي كىرەتتى، بىراق يەنە ئون مىنۇت توشمايلا، بىر نەرسە ئېسىگە كېلىپ ئالدىراش چىقىپ كېتەتتى. ئۇنى تونۇغاندىن بۇيان، ئۇنىڭ بۇنداق ھالىتىنىڭ ئۆزگەرگەنلىكىنى كۆرۈپ باقمىدىم، ئۇنى تونۇيدىغانلارنىڭ ھەممىسى ئۇنىڭ نېمىگە ئالدىراش يۈرىدىغانلىقىغا قىزىقاتتى. بىر قېتىم بىر قانچەيلەن ئۇنىڭ بىلەن پاراڭلىشىپ قالدۇق.
− نېمىگە ئالدىراش يۈرەتتىم؟ ۋاقىت يېتىشمەيدىغۇ زادى، − دەپ گېپىنى باشلىدى ئۇ، − ئانچە - مۇنچە ئىشلەپ پۇل تاپاي دېگەن، شۇڭا، شىركەتلەرگە بېرىپ تۇرىمەن، ئىش چىققاندا شۇ ئىشلار بىلەن ئالدىراش بولىمەن...، قىز دوستۇم كىنو كۆرۈشكە ئامراق دېگىنە، شۇڭا، پات - پات ئۇنىڭغا ھەمراھ بولۇپ، كىنو كۆرمىسەم بولمايدۇ...، ياتاقتىكى بالىلار ئۇ يەرگە بارىمىز، بۇ يەرگە بارىمىز، دەپ تۇرىدۇ، بارمىسام تېخى بولمىغان...
ئۇنىڭ گېپىنى ئاڭلاپ «تۇرمۇشۇڭ نېمىدېگەن رەڭدار - ھە» دەپ چاقچاق قىلىشقانىدۇق. لېكىن، ئەمدى ئويلىسام بۇ تونۇشۇم ئەينى چاغدا جىددىي، ئەمما مۇھىم ئەمەس ئىشلارنىڭ قاينىمىدا يۈرگەن ئىكەن.
جىددىي ھەم مۇھىم ئىش بىلەن جىددىيمۇ ئەمەس، مۇھىممۇ ئەمەس ئىشنى پەرقلەندۈرۈش ئاسان. مەسىلەن، ئىستۇدېنتلار ئۈچۈن ئېيتقاندا، ئىمتىھان، ئوقۇش پۈتكۈزۈش دىسسېرتاتسىيە يېزىش قاتارلىقلار جىددىي ھەم مۇھىم ئىش؛ كېچىچە كىنو كۆرۈش، كومپيۇتېردا ئويۇن ئويناش قاتارلىقلار جىددىيمۇ ئەمەس، مۇھىممۇ ئەمەس ئىش. خىزمەتتىكىلەر ئۈچۈن، رەھبەر ئورۇنلاشتۇرغان خىزمەتنى تاماملاش، كېسەل بولسا ۋاقتىدا داۋالىنىش قاتارلىقلار جىددىي ھەم مۇھىم ئىش؛ يىغىلىش، بازار ئايلىنىش قاتارلىقلار جىددىيمۇ ئەمەس، مۇھىممۇ ئەمەس ئىش.
بىزنى قايمۇقتۇرىدىغىنى جىددىي، ئەمما مۇھىم ئەمەس ئىش بىلەن مۇھىم، ئەمما جىددىي ئەمەس ئىش، بىراق كۆپىنچە ۋاقىتتا زېھنىمىزنى جىددىي، ئەمما مۇھىم ئەمەس ئىشقا سەرپ قىلىدىكەنمىز. بەزىدە جىددىي، ئەمما مۇھىم ئەمەس ئىش بىلەن مۇھىم، ئەمما جىددىي ئەمەس ئىشنىڭ تەرتىپىنى ئالماشتۇرۇپ قويۇپ، تۇرمۇشىمىز ھەم كەلگۈسىمىز ئۈچۈن ھەقىقىي مۇھىم بولغان ئىشلارنى قىلىشقا ۋاقىت چىقىرالمايدىكەنمىز.
ئۇنداقتا، قانداق ئىش جىددىي، ئەمما مۇھىم ئەمەس ئىش، قانداق ئىش مۇھىم، ئەمما جىددىي ئەمەس ئىش؟
  مەندىن بىر نەچچە ياش كىچىك بىرەيلەن، ئوقۇش پۈتكۈزۈپ، تەستە تاشقى سودا شىركىتىگە خىزمەتكە چۈشتى، لېكىن شۇنچە تىرىشىپ ئىشلىسىمۇ، بىر ئاي ئۆتمەيلا، شىركەت خوجايىنى ئۇنى يولغا سېلىپ قويۇپتۇ. خوجايىننىڭ ئېيتىشىچە، ئۇ گەرچە تىرىشچان بولسىمۇ، ئىنگلىز تىلىنى بىلمەيدىكەن، پىراۋىسىمۇ يوقكەن، شىركەتكە دەرھال ئىش قىلىپ بېرەلەيدىغان ئادەم لازىمكەن. ئۇنىڭدىن نېمىشقا ئالىي مەكتەپتە ئىنگلىز تىلى ئۆگىنىپ، پىراۋا ئېلىپ قويمىغانلىقىنى سورىسام، ئالىي مەكتەپتە مۇھەببەتلىشىش، قوشۇمچە ئىشلەش بىلەن ئالدىراش ئۆتۈپ، بۇ ئىشلارغا ئېرەن قىلمىغانلىقىنى ئېيتتى.
بىزدە «بۇرنىنىڭ ئۇچىنىلا كۆرمەك» دېگەن گەپ بار، بۇ دەل جىددىي، ئەمما مۇھىم ئەمەس ئىشلارغا چېپىلىۋېلىشنى كۆرسىتىدۇ. مۇشۇ تونۇشۇمغا ئوخشاش كۆپىنچە ۋاقتىنى قارىماققا جىددىي كۆرۈنىدىغان، ئەمما كېيىنكى تۇرمۇشىغا ئانچە مەنپەئەت بەرمەيدىغان ئىشلارغا ئاجرىتىۋېتىدىغانلار كۆپ، ئەگەر دائىم جىددىي ئىشلار سەۋەبلىك مۇھىم ئىشلارنى قىلىشنى كەينىگە سۈرۈۋەرسەك، مۇھىم ئىشلار ئاقىۋەتتە ناھايىتى مۇھىم ۋە ناھايىتى جىددىي ئىشقا ئايلىنىپ قالىدۇ - دە، ئەسلىدىكىدىنمۇ زور بەدەل تۆلىشىمىزنى تەلەپ قىلىدۇ.
ئۆگىنىش قىلىش جىددىي ئىشتەك تۇيۇلمايدۇ، لېكىن كەلگۈسى ئۈچۈن ئېيتقاندا ئۇ تولىمۇ مۇھىم ئىش. قولۇمدىكى ئىشلار تۈگىگەندە، ۋاقىت چىققاندا ئۆگىنىمەن، دېگەن ئىدىيەدە يۈرۈۋەرسىڭىز، بىر كۈنلەردە ئۆزىڭىزنىڭ سەپتىن چۈشۈپ قالغانلىقىڭىزنىمۇ بىلمەي قالىسىز؛ چېنىقىش، ساغلاملىققا ئەھمىيەت بېرىش جىددىي ئىش ئەمەس، ئەمما ئۇزاق مەزگىلنى كۆزلىگەندە مۇھىم ئىش. ھامان بىر كۈنى چېنىقىمەن، كېيىنچە داۋالىنىمەن، دەپ بۇلارغا ئەھمىيەت بەرمىسىڭىز، كەلگۈسىدە كېسەل چىرمىۋالسا، ھەم ئازابلىنىسىز، ھەم چىقىمدار بولىسىز؛ بالا تەربىيەلەش جىددىي ئىش ئەمەس، ئەمما تولىمۇ مۇھىم ئىش. خىزمىتىڭىزنىڭ ئالدىراشلىقى، سورۇن - يىغىلىشلىرىڭىزنىڭ كۆپلۈكى سەۋەبلىك بالا تەربىيەسىگە سەل قارىسىڭىز، ۋاقتى كەلگەندە نېمىلا قىلسىڭىز ئورنىنى تولدۇرالمايسىز.
ئون يىلدىن كېيىن باشقىلار بىلەن بولغان پەرقىڭىزنى ھازىر قانداق ئىش بىلەن ئالدىراش بولۇۋاتقانلىقىڭىز بەلگىلەيدۇ. كۈندە ئازىراق ۋاقتىڭىزنى كەسپىڭىزگە ئالاقىدار بىلىملەرنى ئۆگىنىش، تىل ئۆگىنىش، بالا تەربىيەلەش، چېنىقىش، تېخنىكا ئۆگىنىش، بىلىم قۇرۇلمىسىنى مۇكەممەللەشتۈرۈشتەك مۇھىم، ئەمما جىددىي ئەمەس ئىشلارغا ئاجراتسىڭىز، ھامان بىر كۈنى پايدىسىنى كۆرىسىز.
 

[an error occurred while processing this directive]
[an error occurred while processing this directive]
[an error occurred while processing this directive]
نادىر ناخشا – مۇزىكىلار
تور بېتىمىزدىكى يېڭىلىقلار
رادىيو دىراممىسى
بۇ بەتنىڭ نەشىر ھوقۇقى شىنجاڭ خەلق رادىيو ئىستانسىسىغا تەۋە
ئالاقىلىشىش نومۇرى: 2571553، 2578492
ئادرىسىمىز: ئۈرۈمچى شەھىرى ئىتتىپاق يولى 830- نومۇر شىنجاڭ خەلق رادىيو ئسىتانسىسى تور مەركىزى