قىزىق نوقتا خەۋەرلىرى

كىتاپ ئوقۇش ۋە بەخت تۇيغۇسى

2017-11-10 20:15:54     مەنبەسى: شىنجاڭ خەلق رادىيو ئىستانسىسى   

«كىتاپ ئىنسانىيەت قولىدا ئختىرا بولغان مەنىۋىيەت تۈۋرۈكىدۇر، ئۇ ئىنسانىيەت مەدەنىيىتىنىڭ مەڭگۈلۈك يۈدۈگۈچىسى. كىتاپ مەڭگۈلۈك تېمىلارنىڭ بىرى، ئۇ قەدىمدىن تارتىپلا خۇددى مۇھەببەتكە ئوخشاش كۈيلەنگەن، ئاتا-ئانا مېھرىگە ئوخشاش مەدىھيە ئوقۇلغان...»
كۈتۈپخانىغا خىزمەتكە ئورۇنلاشقىنىمدىن بۇيان كۈندە كىتابلار بىلەن مۇڭدىشىدىغان ۋاقىتلىرىم كۆپەيدى، بۇنىڭدىن ئىپتىخارلىق تۇيغۇسى ۋە بەخت تۇيغۇسىغا چۆمۈلىمەن. ئىنساننىڭ بەخت تۇيغۇسى ئوخشاش ئەمەس، ئەمما ھەممىسىنىڭ ئورتاق نۇقتىسى بار، ئۇ بولسىمۇ خوشاللىق ئوخچۇپ چىققان چاغدىكى كۆڭۈل ئازادىلىكىدۇر، كىتاپ ئوقۇش ھەقىقەتەن بەخت تۇيغۇسىدۇر.
كۈتۈبخانىغا كېلىپ كىتاپ ئارىيەت ئالىدىغان بىر قىز بار. ياسىنىشى ئاددى-ساددا، تەقى-تۇرقىدىن مۇلايىملىقى چىقىپ تۇرىدىغان بۇ قىز ئارىيەت ئالغان كىتابنى ۋاقتىدا قايتۇرىدۇ، پاكىز تۇتىدۇ، قايتۇرۇپ بولۇپ يەنە بىر مۇنچە كىتابلارنى ئارىيەت ئېلىپ قايتىدۇ. ئۇنىڭ ئارىيەت ئالىدىغان كىتابلىرىنىڭ تۈرى كۆپ، يەنە كېلىپ خەنزۇچە كىتابلارنىمۇ ئارىيەت ئالىدۇ. بۇ قىزغا دېققەت قىلىۋاتقىنىمغا ئۇزاق بولدى. ئۇنىڭ بىلەن سۆزلىشىشنى ئىستىسەممۇ پۇرسەت بولماي كەلگەنىدى. بىر قېتىم پۇرسەتمۇ كەلدى.
-كىتاپ ئوقۇشنى ياخشى كۆرىدىكەنسىز ھە،-دېدىم قىزغا تىزىملىكتىكى كىتابلىرىنى سۇنغاچ.
-ھەئە،-دېدى قىز بوش ئاۋازدا،-بىر خوشاللىقىم كىتاب ئوقۇشتىن كېلىدۇ.
-مۇنداق دەڭ، ئۆيىڭىزدە ساقلاپ قويغان كىتابلىرىڭىز كۆپمۇ؟-دېدىم ئۇنىڭغا.
-ئانچە كۆپ ئەمەس، لېكىن ياخشى كىتابلىرىم بار،-دېدى قىز ،-ئارىيەت ئالغان كىتابلاردىن خاتىرە قالدۇرىمەن، بۇنىڭ ھامان بىر كۈنى ئەسقېتىپ قالىدىغانلىقىغا ئىشىنىمەن.
-كىتاب ئوقۇشتىن خوشاللىق تاپىدىكەنسىز-دە،-دېدىم مەن ئۇنىڭدىن كۆپرەك گەپ ئېلىش ئۈچۈن.
-ئەلۋەتتە،-قىزنىڭ كۆزى چاقناپ كەتتى،-كىتاب ئوقۇش چوڭ خوشاللىقىمنىڭ بىرى. كىتاب ئوقۇغىنىمدا ئۇنتۇشقا تېگىشلىك نۇرغۇن نەرسىلەرنى ئۇنتۇيمەن، ئەمما يېڭى-يېڭى نۇرغۇن كىشى ۋە نۇرغۇن نەرسىلەر بىلەن تونۇشىمەن. ئويلايدىغىنىم كۆپ، پەقەت كىتابلا ماڭا ياردەم قىلالايدۇ.
-توغرا ئېيتتىڭىز،-دېدىم مەن ئۇنىڭ سۆزلىرىگە قوشۇلۇپ، كىتاب ئۆزىدە ھازىر قىلغان نۇرغۇن نەرسىلىرى بىلەن كىشىلەرگە مۇڭداش ۋە ئۇستاز بولالايدۇ.
قىز سۆزۈمگە قوشۇلۇپ بېشىنى لىڭشىتتى ۋە:
-ھەدە، يېقىندىن بۇيان دېققەت قىلدىڭىزمىكىن، مەن خەنزۇچە كىتابلارنىمۇ ئارىيەت ئېلىۋاتىمەن. ھازىر خەنزۇ تىلىدىنمۇ ئوبدانلا ساۋادىم چىقىپ قالدى، شۇڭا خەنزۇچە كىتابلاردىنمۇ بىۋاستە پايدىلىنىۋاتىمەن. سىزگە راست گەپنى ئېيتسام، كىتاب ئوقۇش بىلىدىغانلىرىمنى كۆپەيتتى، كىتاب ئوقۇش ئارقىلىقلا بۇ دۇنيادا مۇشۇنداق كۆپ ھېكايىلەرنىڭ بارلىقىنى، خىلمۇ-خىل كىشىلەر بىلەن دۇنيانىڭ جەلىپكار بولىدىغانلىقىنى بىلدىم،-دېدى.
مانا خوشاللىق، مانا ھوزۇر دېگەن! كىشى كىتاپ ئوقۇش ئارقىلىق ئوخشىمىغان ماكان-زاماندىكى باشقا كىشىلەرنىڭ ئىچكى دۇنياسىغا كىرەلەيدۇ؛  كىتاپ ئوقۇغان كىشى تونۇش ۋە بىلىش دائىرىسىنىڭ ئۈزلۈكسىز كېڭىيىۋاتقانلىقىدىن ھەيرانلىق ھېس قىلىدۇ.
كۈتۈپخانىمىزنىڭ بەس-بەستە كىتاپ ئارىيەت ئېلىۋاتقان كىشىلەر بىلەن ئاۋات بولۇشنى تولىمۇ ئۈمۈد قىلىمەن. بۇنداق  ئۈمۈد-ئارزۇلاردا بولىدىغان كىشى بەكمۇ كۆپ. ھەر يىلى 23-ئاپرېل ئۆتكۈزىلىدىغان «دۇنيا كىتاپ ئوقۇش كۈنى» مۇشۇ ۋەجىدىن ئوتتۇرغا چىققان. ئومومىي خەلق ساپاسىنى يۇقىرى كۆتۈرۈشتە كىتاپ ئوقۇش بەكمۇ مۇھىم.
دەۋرىمىزدە كىتابنىڭ تۈرلىرى كۆپەيدى، بۇنى رەقەم بىلەن ئىپادىلەشمۇ بىر مەسىلە، ئەمما، كىتاب يۈزىگە چىقمىغان بوشلۇق يەنىلا نۇرغۇن. دەرۋەقە، كىتاپ«ۋاراقلىساقلا مەنپەئەت بېرىدۇ»، ئەما كىتاب دېڭىزىدا غەۋۋاس بولۇشنىڭ ئۆزى بىر ماھارەت.
كىتاب بىلەن مۇناسىۋەتلىك كۈتۈبخانا خىزمىتى بىلەن مەشغۇل بولىۋاتقىنىم ئۈچۈن تولا ھاللاردا دوست-يارەنلەرگە كىتاب ئوقۇشنى تەۋىسيە قىلىمەن.
-قانداق كىتابلارنى ئوقۇسام بولار؟-دېدى بىر دوستۇم.
-ئوقۇيمەن دېسەڭ كىتاب بەكمۇ كۆپ، ھەممىنى ئوقۇپ بولالىشىڭ مۇمكىن ئەمەس. تاللاپ ئوقۇغىن. ئۆزۈڭنىڭ ئەمەلىي ئەھۋالىڭغا ماس بولغان كىتابلارنى ئوقۇغىن؛چوقۇم ئوقۇشقا تېگىشلىك، زۆرۈر كىتابلارنى ئوقۇغىن،-دېدىم ئۇنىڭغا.
ئۇنىڭ:«بالام بىلەن شۇنچە ئالدىراش تۇرسام، كىتاب ئوقۇشقا نەدە چولا»دېيىشى تۇرغانلا گەپ ئىدى. مەن ئۇنىڭ گېپىنى ساقلىمايلا:
-دوستۇم، بالا تەربىيلەش توغرىسىدا نۇرغۇن كىشىلەر بىلەن پىكىر ئالماشتۇرۇپ بولۇشۇڭ مۇمكىن ئەمەس. كىتابمۇ پىكىر ئالماشتۇرۇش قورالى، سەن پەرزەنت تەربىيەسىگە ئائىت كىتابلارنى ئوقۇغىن، بالاڭ ھەققىدە كىتاب بىلەن مۇڭدىشىپ باققىن، شۇ چاغدا نېمىلەرنى ھېس قىلغانلىقىڭنى ئويلىنىپ باقساڭ بولىدۇ. ئىشىنىمەنكى، چوقۇم ماڭا رەھمەت دەيسەن،-دېدىم.
كىتاب ئوقۇشنى ياخشى كۆرىدىغان ئادەمگە نىسبەتەن، كىتاب ئوقۇش تەسۋىرلىگۈسىز ھوزۇر؛ كىتابتا ئىپادىلەنگەن ئوي-پىكىر ئۇنىڭ ئۈچۈن شەكىلسىز ھەرىكەتلەندۈرگۈچى كۈچ بولۇپ، چوقۇم ئۇنىڭ ئىدىيەسىگە، كۆز قارىشىغا تەسىر كۆرسىتىدۇ. ئەلۋەتتە، كىتابنى ئۆزىنىڭ ئۆگىنىش،خىزمەت، قىزىقىش ۋە كەسىپ نۇقتىسىدىن تاللاپ ئوقۇش بەكمۇ مۇھىم. ئېنىقكى، داڭلىق ئالىم ۋە دانىشمەنلەرنىڭ نۇرغۇن كىتاب ئوقۇغان بولۇشى ياكى نۇرغۇن كىتاب يازغان بولۇشى ناتايىن، شۇنداقلا چوقۇم شۇنداق بولۇشى كېرەك ئەمەس. ئۇ بىزگە كىتابلارنىڭ ئۆزىگە خاس تۈر ۋە خىلغا بۆلۈنىدىغانلىقىنى ئېيتىپ بېرىدۇ. ئوقۇرمەندىنمۇ ئۆز ساھەسىگە ماسلاشتۇرۇپ تاللاپ ئوقۇشنى تەلەپ قىلىدۇ.
مەن توغرا ئېيتقانىدىم. ئارىدىن بىر قانچە ئاي ئۆتكەندىن كېيىن ھېلىقى دوستۇم تېلېفۇن قىپتۇ.
-ئالدى بىلەن ساڭا رەھمەت ئېيتىۋالاي، سېنىڭ تەۋىسيەڭ بىلەن بالا تەربىيەسىگە ئائىت ئىككى پارچە كىتاب سېتىۋېلىپ ئوقۇدۇم. بىلەمسەن، ئۆزۈم يولۇققان بەزى مەسىلىلەرگە جاۋاب تېپىۋالدىم،-دېدى ئۇ ھاياجان بىلەن.
مەن ئۇنىڭغا مۇشۇ كىتابلار بىلەنلا توختاپ قالماسلىقنى، كىتاب ئوقۇشنى ئۆزىگە ئادەت قىلىشنى جېكىلىدىم، ئۇ ماقۇل بولدى.
مېنىڭچە كىتاپ ئوقۇش ئاڭلىق ھەركەتكە ئايلىنىشى كېرەك. كىتاپ ئوقۇشنى ياخشى كۆرۈدىغان كىشىگە نىسبەتەن، ھايات بىلەن كىتاپ ئايرىغىلى بولمايدىغان دەرجىدە بىر-بىرىگە كىرىشىپ كەتكەن بولىدۇ. ئادەم بىلەن كىتاپنىڭ مۇناسىۋىتى بەكمۇ يېقىن.
كىتاپ كۆرۈش زېھنىنى ئاچىدىغان ئەمگەك، شۇنداقلا كۆڭۈللۈك ساياھەت. كىتاپ ئوقۇش مۇستەقىل تەپەككۈر ئىقتىدارىنى تاۋلايدىغان ۋاستىدىن ئىبارەت. تەپەككۈرى ئويغاق ۋە چوڭقۇر كىشىلەردىن بولۇش، مۇھىمى ھەقىقىي ئادەم بولۇش، ھاياتتىن ھەقىقىي مەنە يارىتىش ئۈچۈن كىتاپنى دوست تۇتۇش، كىتاپ ئوقۇشنى كۈندىلىك ئاڭلىق ھەركىتىمىزگە ئايلاندۇرۇش تەرەققىيات تېز بولۇۋاتقان بۇ دەۋردە تولىمۇ مۇھىم.

[an error occurred while processing this directive]
[an error occurred while processing this directive]
[an error occurred while processing this directive]
نادىر ناخشا – مۇزىكىلار
تور بېتىمىزدىكى يېڭىلىقلار
رادىيو دىراممىسى
بۇ بەتنىڭ نەشىر ھوقۇقى شىنجاڭ خەلق رادىيو ئىستانسىسىغا تەۋە
ئالاقىلىشىش نومۇرى: 2571553، 2578492
ئادرىسىمىز: ئۈرۈمچى شەھىرى ئىتتىپاق يولى 830- نومۇر شىنجاڭ خەلق رادىيو ئسىتانسىسى تور مەركىزى