قىزىق نوقتا خەۋەرلىرى

ئائىلە ئىناقلىقىنى كۈچەيتىشتە

2017-11-11 20:35:39     مەنبەسى: شىنجاڭ خەلق رادىيو ئىستانسىسى   

جورىڭىزغا ئائىلىنىڭ ئىللىقلىقىنى ھېس قىلدۇرۇڭ
جورىڭىزغا ئائىلە ئىللىقلىقىنى ھېس قىلدۇرۇشتا ئۆينىڭ تامىقىغا سەل قارىماڭ. ئېسىڭىزدە بولسۇنكى، قازان قاينىتىلمىغان ئۆينىڭ مېھرى بولمايدۇ. مەيلى ئېرىڭىز ياكى بالىڭىز بولسۇن، كۈندە سىرتتا تاماق يەۋەرسە ھامان بىر كۈنى زېرىكىدۇ ياكى سالامەتلىكىدە مەسىلە كۆرۈلىدۇ. شۇڭا ئۆيدە چوقۇم بىر ۋاق بولسىمۇ تاماق ئېتىڭ. بىر ئائىلە كىشىلىرى داستىخان ئەتراپىغا ئولىشىپ تاماق يېيىشنىڭ ھۇزۇرىغا ھېچنېمە يەتمەيدۇ. ئۇنىڭدىن باشقا، سىزنىڭ تاماق ئېتىشىڭىز ئائىلىڭىزدە ئاياللىق، ئانىلىق ئوبرازىڭىزنى تىكلىشىڭىزنىڭ ياخشى پۇرسىتى بولالايدۇ. چوقۇم ۋاقىت ئىچىدىن ۋاقىت چىقىرىپ، ئۆيىڭىزنى پاكىز تازىلاپ، چىرايلىق سەرەمجانلاشتۇرۇپ تۇرۇڭ. ئۆيىڭىزنى پاكىز، رەتلىك تۇتسىڭىز ئائىلىنىڭ ئىللىقلىقىنى ھېس قىلغان جورىڭىز ئۆزىمۇ مۇۋاپىق ئۇسۇللار بىلەن سىزگە بولغان مۇھەببىتىنى ئىپادىلەيدۇ. چىن نىيەتتىن قىلىنغان كۆيۈنۈش ئەر- ئاياللىق مېھىرنى چوڭقۇرلاشتۇرىدۇ.
 جورىڭىزدىن ئېرىشىشنىلا تەلەپ قىلماڭ
بەزى ئەر- ئاياللار ھېيت- بايرام، تۇغۇلغان كۈنلەردە جورىسىنىڭ ئۆزىگە قىممەت باھالىق بۇيۇملارنى سوۋغا قىلىشنى ئۈمىد قىلىدۇ. بۇ ئەھۋال قىز-ئاياللاردا كۆپرەك ئۇچرايدۇ. مېنىڭچە ئەر- ئاياللار بىر- بىرىگە بولغان مېھىر- مۇھەببىتىنى ماددىي بۇيۇمغىلا باغلاپ قويماسلىقى كېرەك. ناۋادا جورىڭىز خاتىرە كۈنلەردە سوۋغا بېرەلمىسە جورىڭىزغا باتناپ، تەنە گەپلەر بىلەن ئۇنىڭغا ھۇجۇم قىلماڭ، بۇنداق قىلسىڭىز بۇ خىل كۆڭۈلسىزلىك ھەر ئىككىڭلارغا روھىي ئازاب ئېلىپ كېلىشى مۇمكىن. ئېرىشىش تەمەسىدىلا بولماڭ، سوۋغاتنىلا كۆڭۈلنىڭ ئىپادىلىنىشى دەپ چۈشىنىۋالماڭ. ماددىي بۇيۇمدىنمۇ قىممەتلىك كۆڭۈلگە بەكرەك ئەھمىيەت بېرىڭ.
 جورىڭىزنىڭ ئارتۇقچىلىقىنى تىلغا ئېلىپ تۇرۇشنى ئۇنتۇماڭ
ئۆي تۇتۇشتىكى مەقسەت نىكاھلىق تۇرمۇشنىڭ خۇشاللىقىدىن ئورتاق بەھرىمەن بولۇش؛ پەرزەنتلىك بولۇپ ۋە ئۇنى ياخشى تەربىيەلەپ، جەمئىيەتنىڭ ساغلام تەرەققىي قىلىشى ئۈچۈن كۈچ چىقىرىشتۇر. مەيلى ياش ياكى ئوتتۇرا ياش ئەر- ئاياللار بولسۇن، تۇرمۇشتا ياكى خىزمەتتە ھەر خىل كۆڭۈلسىزلىكلەردىن خالىي بولالمايدۇ. بىر قىسىم ئەر- ئاياللار كۆپىنچە ھاللاردا جورىسىنىڭ كۆڭۈلسىز كەيپىياتىغا پەرۋاسىز قارايدۇ ياكى پاسسىپ پوزىتسىيە تۇتىدۇ، بۇ خىل پاسسىپ پوزىتسىيە ئويلىمىغان بېسىملارنى پەيدا قىلىشى مۇمكىن. شۇڭا جورىڭىزنىڭ ئارتۇقچىلىقىنى ئۆزىگە ھېس قىلدۇرۇپ ئۇنىڭ ئۆزىگە بولغان ئىشەنچىسىنى تۇرغۇزۇشقا ياردەم بېرىڭ. جورىڭىزنىڭ ئائىلە ئۈچۈن جاپا تارتىۋاتقانلىقىنى ھېس قىلغىنىڭىزدا ماختاڭ، ئۇنىڭغا بولغان مىننەتدارلىقىڭىزنى بىلدۈرۈڭ. بۇ ئەر- ئاياللار ئوتتۇرىسىدىكى چۈشىنىشنى ئىلگىرى سۈرۈپ، ئائىلە ئىناقلىقىنى مۇستەھكەملەشكە پايدىلىق.
 ئائىلە زىددىيىتى كۆرۈلگەندە سوغۇققان بولۇڭ
ياش ئەر- ئاياللار ئائىلە ئىقتىسادىنى باشقۇرۇش ۋە جورىسىنىڭ ئاتا -ئانىسى بىلەن بولغان نازۇك مۇناسىۋەتلىرىنى بىر تەرەپ قىلىشتا بەزى زىددىيەتلەردىن خالىي بولالمايدۇ. بەزىلەر بۇنداق ئەھۋالغا يولۇققاندا ئۆزىنىڭ يېقىن دوستلىرىغا دەرد تۆكۈشكە ئالدىرايدۇ. شۇڭا بۇ خىل ئەھۋالدا باشقىلارغا مەسلىھەت سېلىپ يۈرمەي، ئاۋۋال ئۆزىڭىزنىڭ كەيپىياتىنى تۇراقلاشتۇرۇپ، جورىڭىز بىلەن بىللە ئولتۇرۇپ پاراڭلىشىش، مۇڭدىشىش يولى ئارقىلىق مەسىلىنى ھەل قىلسىڭىز بولىدۇ.
يىغىپ ئېيتقاندا، ئەر- ئاياللارنىڭ ئىناق ئەر- ئاياللىق مۇناسىۋەت ئورنىتىپ ئائىلىسىنى مۇستەھكەملىشى ھەر ئىككى تەرەپنىڭ ئورتاق تىرىشچانلىقىغا، چوڭلارنىڭ يېتەكلىشىگە، كۆڭۈل قويۇپ پەرۋىش قىلىشىغا موھتاج.

[an error occurred while processing this directive]
[an error occurred while processing this directive]
[an error occurred while processing this directive]
نادىر ناخشا – مۇزىكىلار
تور بېتىمىزدىكى يېڭىلىقلار
2018-يىلى 1-ئاي
2018-يىلى 2-ئاي
2017-يىلى 11-ئاي
2017-يىلى 12-ئاي
2018-يىلى 3-ئاي
رادىيو دىراممىسى
بۇ بەتنىڭ نەشىر ھوقۇقى شىنجاڭ خەلق رادىيو ئىستانسىسىغا تەۋە
ئالاقىلىشىش نومۇرى: 2571553، 2578492
ئادرىسىمىز: ئۈرۈمچى شەھىرى ئىتتىپاق يولى 830- نومۇر شىنجاڭ خەلق رادىيو ئسىتانسىسى تور مەركىزى