قىزىق نوقتا خەۋەرلىرى

مەنمۇ دوستلىرىمدەك ياشاي

2017-11-27 20:25:37     مەنبەسى: شىنجاڭ خەلق رادىيو ئىستانسىسى   

تاڭ سەھەر، بالا شېرىن چۈشلەر قوينىدا ئەللەيلىنىۋاتاتتى. ئانىنىڭ زىل ئاۋازى ئۇنى چۈشلەر قوينىدىن تارتىپ چىقاردى.
- ئوغلۇم، تۇرۇڭ، چاي ئىچىڭ.
بالا ئورنىدىن ئېرىنىپ تۇردى- دە، كىيىملىرىنى كىيىشكە باشلىدى. ئاپىسى ئۇنىڭ يېنىدا دەرھال ھازىر بولۇپ، بالىنىڭ چاپىنىنى كىيىشىگە ياردەملىشىشكە باشلىدى.
- ئاپا، مەنمۇ توققۇز ياشقا كىردىم، ئۆزۈم كىيەيچۇ؟
- ياق بالام، مەن كىيدۈرۈپ قوياي، سىز مېنىڭ گۆھىرىم.
بالىدىن ئۈن چىقمىدى. ئۇلار تاماق ئۈستىلىگە كەلدى، بالا چىنىسىگە چاي قۇيماقچى بولىۋېدى، ئانا يەنە توسىۋالدى.
- مەن قۇيۇپ بېرەي قوزام، قولىڭىزنى كۆيدۈرىۋالىسىز.
بالا ئانىسى قۇيۇپ بەرگەن چاينى ئېرىنچەكلىك بىلەن ئىچتى. ئۇ چاي ئىچىپ بولغۇچە ئانا ئۇنىڭ سومكىسىنى تەييارلاپ قويغانىدى. بالا سومكىسىنى مۈرىسىگە ئاستى- دە، ئىشىكتىن چىقماقچى بولدى.
- توختاڭ بالام، مەن بىللە چىقاي، سىزنى پەستە دادىڭىزنىڭ شوپۇرى ساقلاپ تۇرىدۇ.
- ئاپا، باشقا دوستلىرىم بىلەن ئاپتوبۇستا بارايچۇ؟ - دېدى بالا ئانىسىغا تەلمۈرۈپ.
- ياق بالام، سىز ئۇلارغا ئوخشىمايسىز. سىز دېگەن چوڭ باشلىقنىڭ بالىسى، بىزنىڭ بارلىقىمىز سىز ئۈچۈن.
بالا ئاپىسىنىڭ ھەمراھلىقىدا پەسكە چۈشۈپ، دادىسىنىڭ پىكاۋىغا چىقتى. ئاپىسى شوپۇرغا نېمىلەرنىدۇر جېكىلەشكە باشلىدى.
چۈش. چۈشلۈك دەم ئېلىش قىسقا بولغاچقا، بالىلار ئۆيگە قايتمايتتى. بالا دوستلىرى بىلەن بىرلىكتە تاماق يېمەكچى بولۇپ ماڭدى-يۇ، دەرۋازا ئالدىغا چىقىپ سالپىيىپ قالدى. چۈنكى دەرۋازا ئالدىدا ئۇنى ئاپىسى ساقلاپ تۇراتتى. ئۇ دوستلىرىدىن ئايرىلىپ، ئاپىسى بىلەن ماڭدى. ئاپا ئوغلىنى بىر ھەشەمەتلىك تېز تاماقخانىنىڭ ئايرىمخانىسىغا ئەكىرىپ، ئېسىل، قۇۋۋەتلىك تاماقلارنى بۇيرۇتۇشقا باشلىدى. بالا ئۈستەلگە لىققىدە كەلگەن تاماقلارغا قاراپلا تويۇپ قالدى. ئانا ئۇنى تاماق يېيىشكە زورلاشقا باشلىدى.
«ئەگەر سەرەڭگە ساتقۇچى قىز، كىچىك سەنماۋلار يېنىمدا بولغان بولسا، مۇشۇ تاماقلارنى يېيىشىپ بېرەر ئىدى» دەپ ئويلىدى بالا. تاماقتىن كېيىن ئاپىسى ئۇنى مەكتەپ دەرۋازىسى ئالدىغا ئەكېلىپ قويۇپ كېتىپ قالدى.
كەچ. چۈشتىن كېيىنكى ئۈچ سائەتلىك دەرسنى تاماملىغان بالا ھارغىن قەدەملىرى بىلەن مەكتەپ دەرۋازىسى ئالدىغا چىقتى. ئۇنى دادىسىنىڭ شوپۇرى ساقلاپ تۇرغانىدى. ئۇ قارا رەڭلىك پىكاپقا قارىدى. شۇ تاپتا بۇ قارا رەڭلىك پىكاپ گويا ئۇنىڭغا چۆچەكلەردىكى قارا دىۋىنىڭ ئۆزگەرگەن شەكلىدەك كۆرۈندى. ئۇ پىكاپقا چىقتى- دە، يولنىڭ چېتىدە خۇشال - خورام يۈگۈرۈشۈپ كېتىۋاتقان ساۋاقداشلىرىغا ھەۋەسلىنىپ قاراپ قالدى.
بالا ھەشەمەتلىك بېزەلگەن ئۆيگە يەنە كەلدى. ئۇنى دادىسى ئالاھىدە تەكلىپ قىلغان ئائىلە ئوقۇتقۇچىسى ساقلاپ تۇراتتى. ئۇ تاماقنى چالا- بۇلا يەپلا مۇئەللىم بىلەن دەرس تەكرارلاشقا ئولتۇردى. ئىككى سائەت ئۇنىڭغا ئىككى يىلدەك تۇيۇلدى. ئۇ ئاستا مېڭىۋاتقان سائەت ئىسترېلكىسىغا كۆزىنىڭ قۇيرۇقىدا قاراپ قويۇپ، ئۆزىنى ۋاقىتنىڭ ئالقىنىدا قېرىپ كېتىۋاتقاندەك ھېس قىلدى. ئۇ تاپشۇرۇقلارنى ئىشلەپ بولغۇچە ئانىسى ئۇنىڭغا بىر ئىستاكان سۈتنى قىزىتىپ تەييار قىلىپ بولغانىدى.
بالا ياتماقچى بولۇپ يوتقانغا كىرىشىگە، ئاپىسى كىرىپ، ئۇنىڭ يوتقانلىرىنى تۈزەشتۈرگەچ:
- ئەتە چۈشتىن بۇرۇن دادىڭىزنىڭ شوپۇرى سىزنى ئىنگىلىز تىلى كۇرسىغا ئېلىپ بارىدۇ، چۈشتىن كېيىن مەن مۇزىكا كۇرسىغا ئاپىرىمەن، كەچقۇرۇن دادىڭىزنىڭ دوستى تاماققا تەكلىپ قىلدى. شۇ يەرگە بارىمىز.
- ئەتە مۇئەللىم بىزنى دالا سەيلىسىگە ئېلىپ چىقماقچى ئىدى، ئاپا.
- دالا سەيلىسىگە دادىڭىز بىلەن كېيىن ئاپىرىمىز. ئېنگىلىز تىلى ئۆگىنىش مۇھىم. ھازىرقى مۇئەللىملەرنى قاراڭ، بالىلارنىڭ ئۆگىنىشىنى چىڭ تۇتماي نەدىكى يەرلەرگە ئېلىپ بېرىپ، - ئاپىسى كوتۇلدىغىنىچە چىقىپ كەتتى.
بالا ئۈن چىقارماي كۆزىنى يۇمۇۋالدى. ئۇنىڭ قەپەستىكى قۇشقاچتەك سىقىلغان يۈرىكى «مەنمۇ دوستلىرىمدەك ياشاي ئاپا!» دەپ نىدا قىلماقتا ئىدى.

[an error occurred while processing this directive]
[an error occurred while processing this directive]
[an error occurred while processing this directive]
نادىر ناخشا – مۇزىكىلار
تور بېتىمىزدىكى يېڭىلىقلار
رادىيو دىراممىسى
بۇ بەتنىڭ نەشىر ھوقۇقى شىنجاڭ خەلق رادىيو ئىستانسىسىغا تەۋە
ئالاقىلىشىش نومۇرى: 2571553، 2578492
ئادرىسىمىز: ئۈرۈمچى شەھىرى ئىتتىپاق يولى 830- نومۇر شىنجاڭ خەلق رادىيو ئسىتانسىسى تور مەركىزى