قىزىق نوقتا خەۋەرلىرى

ماناسنىڭ بىر قىزىل، بىر ئاق كەسپى دېھقانلارنى شاتلاندۇردى

2017-12-01 17:27:29     مەنبەسى: شىنجاڭ خەلق رادىيو ئىستانسىسى   

ئاقبالداقتەك ئېچىلىپ كەتكەن پاختا دېڭىزىنىڭ چېتىگە كۆز يەتكۈسىز، شوخلا ئېتىزلىرىدىكى قىپ- قىزىل قىزارغان شوخلا مېۋىسى كۆزنىڭ يېغىنى يەيتتى. ئانچە يىراق بولمىغان جايدا پاختا يىغىۋېلىش كومبايىنىدىن ئىككىسى ئۇ باشتىن بۇ باشقا چېپىپ يۈرۈپ ئاقبالداقتەك ئېچىلغان پاختىلارنى يىغىۋېلىۋاتاتتى. تىرىلگەن پاختىلارنى ئۇدۇللۇق توشۇۋاتقان 3 پاختا توشۇش ماشىنىسىمۇ ئالاھىدە كۆزگە چېلىقاتتى. ئالتۇن كۈزنىڭ ئىللىق قۇياش نۇرىغا چۆمۈلگەن مول ھوسۇللۇق بۇ پەسىلدە، ماناس ناھىيەسىنىڭ لوتۇيى بازىرى شاڭجۇاڭزى كەنتىدىكى پاختىكار دېھقان ۋاڭ داگاڭنىڭ يۈزلىرىدە تەبەسسۇم جىلۋېلىنىپ، كۆزلىرى باشقىچە نۇرلىنىپ، خوشلۇقى ئاپتاپتا قارايغان يۈزلىرىگە مانا مەن دەپ تېپىپ چىققانىدى.

10- ئاينىڭ 14- كۈنى ۋاڭ داگاڭ خوشلۇقىنى يوشۇرمايلا مۇخبىرغا مۇنداق دېدى: بۈگۈننىڭ ئۆزىدىلا 120نەچچە توننا پاختا يىغىۋالدىم، ھەر كىلوگرامىنى 6 يۈەن 1مودىن ساتتىم دېگەندىمۇ، 700 نەچچە مىڭ يۈەن كىرىم قىلىشىمدا گەپ يوق. ئىلگىرى ھەر بىر ئائىلە ئۆز ئالدىمىزغا تارقاق ئىگىلىك باشقۇرغاچقا، چوڭ تىپتىكى مۇنداق يېزا ئىگىلىك ماشىنىلىرىنى ئىشلىتەلمەيتۇق، پەن- تېخنىكا مۇلازىمىتىنى ئومۇملاشتۇرۇشمۇ تەس بولغاچقا، يەرلەرنىڭ ھوسۇلى دېگەندەك چىقمايتى. بىز بىر ئائىلىدىكى ئۈچەيلەن ئىككى يىل بۇرۇن 30 مو كېۋەز تېرىپ، يىلبۇيى پالاقشىغان بىلەن تۈزۈكرەك پۇل تاپالمىغانتۇق.

 يېقىنقى يىللاردىن بۇيان، ماناس ناھىيەسى يېزا ئىگىلىكىنى زامانىۋىيلاشتۇرۇش قەدىمىنى تېزلىتىپ، يېزا ئىگىلىك ئىشلەپچىقىرىشى ۋە ئىگىلىك باشقۇرۇش ئۇسۇلىدا كۆرىنەرلىك ئۈنۈملەرنى قولغا كەلتۈردى. بۇ ئۆزگىرىشلەرنى كۆرگەندىن كېيىن لوتۇيى بازىرى شاڭجۇاڭزى كەنتىدىكى دېھقان ۋاڭ داگاڭ بۇلتۇر 3 مىڭ مو يەرنى ئوبوروت قىلىپ، «يىنۇڭ دېھقانلار كەسپىي ھەمكارلىق كوپراتىپى» نى قۇردى ھەمدە كۆلەملەشكەن تېرىقچىلىق ئۇسۇلى، ئاپتوماتىك سۇغۇرۇش، ماشىنىلاشقان پاختا يىغىۋېلىش يېڭى ئەندىزىسىنى قوللىنىپ، ئىلگىرىكى ئەنئەنىۋى دېھقاندىن بىراقلا يېڭىچە كەسىپلەشكەن دېھقانغا ئۆزگەردى.

ۋاڭ داگاڭ مۇنداق دېدى: 3 مىڭ مو يەرنىڭ ئوتتۇرىچە مو بېشى چىگىتلىك پاختا مەھسۇلاتى 480 كىلوگرام بولدى دەپ ھېساپلىغاندىمۇ، ساپ كىرىمى 9 مىليون يۈەنگە يېقىنلىشىدۇ. بۇنى قانداقمۇ ئىلگىرىكىگە سېلىشتۇرغىلى بولسۇن، بۇرۇنلاردا 30 نەچچە مو يەردىن بىر ئائىلىدىكى ئۈچەيلەن بېرى كېلەلمەيتۇق، ھازىر 3 مىڭ نەچچە يۈز مو يەرنى تۆت ئادەم بىمالال باشقۇرۇپ كېتىۋاتىمىز.

ۋاڭ داگاڭ يەنە مۇنداق دېدى: بۇ يىل پاختىدىن مول ھوسۇل ئالدۇق، بۇنىڭدا ئاساسلىقى ماناس ناھىيەلىك پارتكوم، خەلق ھۆكۈمىتى پاختا توقۇمىچىلىق كارخانىلىرى بىلەن ئاكتىپ ئالاقىلىشىش، بازارنى مۆلچەرلەپ تېرىقچىلىق قىلىش يۆنىلىشىنى بەلگىلەپ، بىز پاختىكار دېھقانلارنىڭ قەلبىنى يورۇتتى. بۇنىڭدىن باشقا، ناھىيە بويىچە بىر تۇتاش سورت تاللاش، بىر تۇتاش خېمىيەلىك كونتىرول قىلىش، بىر تۇتاش كېسەللىك، زىيانداش ھاشاراتلارنىڭ ئالدىنى ئېلىش، بىر تۇتاش ئوغۇتلاش، بىر تۇتاش ماشىنا ئارقىلىق يىغىۋېلىشتەك «بەش بىر تۇتاش» باشقۇرۇش ئەندىزىسىنى ئەمەلىيلەشتۈرۈپ، كارخانا، ھەمكارلىق كوپراتىپى، دېھقانلار ھەمكارلاشقان ئەندىزىنى قوللىنىپ، پاختىچىلىق ئىشلەپچىقىرىشىنىڭ سۈپەت، ئۈنۈمىنى يۇقىرى كۆتۈرۈپ، دېھقانلارنىڭ كىرىمىنى ئاشۇردى.

 لوتۇيى بازىرىنىڭ شاڭجۇاڭزى كەنتىدىكى زامانىۋىيلاشقان ئۈلگە كۆرسىتىش رايونىغا كەلگەندە، مۇخبىر چوڭ تىپتىكى پاختا يىغىۋېلىش كومبايىنىنىڭ ئاقبالداقتەك ئېچىلىپ كەتكەن كېۋەز ئېتىزىدا ئۇياقتىن بۇياققا چېپىپ يۈرگەنلىكىنى، يەنە بىر چەتتە چوڭ تېپتىكى شوخلا يىغىۋېلىش ماشىنىسىنىڭ جىددى مەشغۇلات قىلىۋاتقانلىقىنى كۆردى.

شوخلا يىغىۋېلىش ماشىنىسى ئۆتۈپ كەتكەندىن كېيىن، قىپ- قىزىل شوخلىلار يىغىش خالتىسىغا چۈشەتتى. شاڭجۇاڭزى كەنتىدىكى ۋۇ شىنمىن ئۆز ئائىلىسىنىڭ 500 مو شوخلا ئېتىزىدىكى شوخلىلارنىڭ يىغىپ بولۇنغىنىنى ئۆز كۆزى بىلەن كۆرۈپ تۇرغاچقا، چىرايىدا مەمنۇنىيەت تەبەسسۈمى يالتىرايتى.

ۋۇ شىنمىن مۇنداق دېدى: 500 مو شوخلىزارلىقىمنىڭ ئوتتۇرىچە مو بېشى مەھسۇلاتى 7 توننىدىن ئېشىپ، جەمئىي 3 مىڭ 500 مىڭ توننىدىن كۆپرەك مەھسۇلات چىقتى، ساپ پايدامنى مۆلچەرلىسەم 200 مىڭ يۈەندىن ئېشىپتۇ. بۇ يىل تېرىغان شوخلىلىرىم گەرچە يۇقىرى تېمپىراتۇرىلۇق ھاۋا رايىنىڭ تەسىرىگە ئۇچرىغان بولسىمۇ، ئەمما يىغىۋېلىشتا يېڭى تېخنىكا قوللانغاچقا، يەنە كېلىپ ئەتىيازدا مايسا كۆچۈرۈشتىن تارتىپ شوخلا مېۋىسىنى يىغىۋېلىشقىچە تولۇق ماشىنىلىشىش ئىشقا ئاشقاچقا، تەننەرق تېجىلىپ كىرىمىم ئاشتى. ھازىر بىز دېھقانلار ھەقىقەتەنمۇ دۆلىتىمىزنىڭ تەرەققىيات نەتىجىلىرىدىن بەھرىمان بولىۋاتىمىز، يېزا ئىگىلىك ماشىنا- ئۈسكۈنىلىرىنى سېتىۋالساق تولۇقلىما بېرىلىدۇ، ئۇرۇقلۇققا تولۇقلىما بېرىلىدۇ، ئادەم كۈچى بىلەن قىلىدىغان ئىشلار ئاساسەن يوق دىيەرلىك، ئىلگىرىكىدەك ئېتىز بېشى ئادەم دېڭىزىغا ئايلىنىپ كېتىدىغان ئىشلار بۇ يىل كۆرۈلمىدى، ھازىر يەرلىرىمىزدە پۈتۈنلەي دېگۈدەك ماشىنىلاشقان مەشغۇلات ئېلىپ بارىمىز، مەن دۆلىتىمىزنىڭ دېھقانلارغا نەپ يەتكۈزۈش سىياسەتلىرىنى ھەقىقەتەنمۇ ماختىماي تۇرالمايمەن...

ۋۇ شىنمىن يەنە مۇنداق دېدى: مېنى ئەڭ پەخىرلەندۈرىدىغىنى-- بۇ يىل 500 مو شوخلا ئېتىزىمدا يىراق مۇساپىلىك ئەقلىي ئىقتىدارلىق چۈشۈرگۈ ئۆلچەپ كونتروللاش تېخنىكىسى قوللىنىلىدى، يان تېلېفون APP كونترول قىلىش ئارقىلىق، ئۆيدىن چىقمايلا ئېتىز- ئىرىق سۇغىرىشىنى يىراقتىن كونترول قىلىش ئىشقا ئاشتى. يەنە سۇ بىلەن تەمىنلەش، سۇ تەقسىملەش، سۇ ئىشلىتىشنى باشقۇرۇش ئىشقا ئېشىپ، سۇ بايلىقى، ئادەم بايلىقىنىڭ ئىشلىتىلىش نىسبىتى زور دەرىجىدە ئۆستۈرۈلۈپ، دېھقانچىلىق ئىشلەپچىقىرىش تەننەرقى تۆۋەنلىدى.

 ۋۇ شىنمىن گڭپىنى داۋاملاشتۇرۇپ مۇنداق دېدى: گۈرجەك، رىزىنكە ئۆتۈك، قۇل چىراق ئىلگىرى يەرلەرنى سۇغۇرۇشىمىزدە كىرەكلىك ئۈچ چوڭ گۆھەر سانىلاتتى، ھازىر بۇ زامانىۋىيلاشقان سۇغۇرۇش رايونلىرىدىكى دېھقان ئۆيلىرىدە بۇنداق نەرسىلەرنى كۆرگىلى بولمايدىغان بولۇپ قالدى، يېزا ئىگىلىكىدە ئەقلىي ئىقتىدارلاشقان يېڭى تېخنىكىلارنىڭ توپلىما قوللىنىلىشى، دېھقانچىلىق زىرائەتلىرىنىڭ مەھسۇلاتىنى يۇقىرى كۆتۈرۈپلا قالماستىن، يەنە بۇ بىر يۇقىرى پەن- تېخنىكىنىڭ قوللىنىلىشى بىلەن تېرىقچىلىق تەننەرقى توختالغۇسىز تۆۋەنلىدى. بۇندا مەھسۇلات ئۆسۈپ، تەننەرق تۆۋەنلەش يۈزلىنىشى ئۆز نۆۋىتىدە بىز دېھقانلارنىڭ كىرىمىنىڭ ئېشىشىغا تۈرتكە بولدى.

ماناس ناھىيەلىك پارتكوم دائىمىي كومىتېتىنىڭ ئەزاسى ليۇ چىڭخۇا تونۇشتۇرۇپ مۇنداق دېدى: بۇ يىل ماناس ناھىيەمىزدە 780 مىڭ مو كېۋەز تېرىلدى. يەنە كىلىپ ھەممىسىدە ماشىنىلاشقان تېرىقچىلىق، يىغىۋېلىش ئۇسۇلى قوللىنىلىدى. پاختا ئىشلەپچىقىرىشىدىن ئىبارەت مۇشۇ بىر تۈردىنلا دېھقانلىرىمىزنىڭ كىشى بېشى كىرىمى 450 يۈەندىن ئاشتى.

[an error occurred while processing this directive]
[an error occurred while processing this directive]
[an error occurred while processing this directive]
نادىر ناخشا – مۇزىكىلار
تور بېتىمىزدىكى يېڭىلىقلار
رادىيو دىراممىسى
بۇ بەتنىڭ نەشىر ھوقۇقى شىنجاڭ خەلق رادىيو ئىستانسىسىغا تەۋە
ئالاقىلىشىش نومۇرى: 2571553، 2578492
ئادرىسىمىز: ئۈرۈمچى شەھىرى ئىتتىپاق يولى 830- نومۇر شىنجاڭ خەلق رادىيو ئسىتانسىسى تور مەركىزى