قىزىق نوقتا خەۋەرلىرى

خەلقنى كۆزلەش ئەسلىي مەقسىتىنى ئەمەلىي ھەرىكىتى ئارقىلىق ئەمەلگە ئاشۇرۇش

2017-10-15 19:46:17     مەنبەسى: شىنجاڭ خەلق رادىيو ئىستانسىسى   

19-قۇرۇلتاي ۋەكىللىرىنىڭ خىسلىتى

− ئۈرۈمچى ئىقتىساد- تېخنىكا تەرەققىيات رايونى(تۇدۇڭخابا رايونى) ئوتتۇرا ئاسىيا جەنۇبىي يولى كوچا باشقارمىسى گۇاڭجۇ كوچىسى مەھەللىسى پارتىيە ياچېيكىسىنىڭ شۇجىسى روشەنگۈل توختى توغرىسىدا

  سۈرەتتە: روشەنگۈل توختى (سولدا) ۋاڭ يايىڭنى يوقلىماقتا. (مۇخبىرىمىز فۇ شياڭلۇڭ فوتوسى)

  روشەنگۈل توختى 9- ئاينىڭ 27- كۈنى سائەت 10دا، گۇاڭجۇ كوچىسى مەھەللىسى ئىشخانىسىدا ئەتىگەنلىك يىغىن ئېچىپ، شۇ كۈنلۈك مۇھىم خىزمەتلەرنى ئورۇنلاشتۇرغاندىن كېيىن، تەۋەلىكىدىكى شىڭچېڭ گۈللۈكى شاڭجۇ مەھەللىسى 9- بىنا 4- زال 101- ئۆيدىكى 82 ياشلىق ۋاڭ يايىڭ موماينى يوقلاش ئۈچۈن ماڭدى.

  مەھەللە ئىشخانىسى بىلەن ۋاڭ يايىڭ موماينىڭ ئۆيىنىڭ ئارىلىقى 500 مېتىرمۇ كەلمەيتتى، روشەنگۈل بۇ ئارىلىقنى 20 نەچچە مىنۇتتا ئاران مېڭىپ بولدى: ئۇ يول بويى ئۇچرىغان ئەخلەتلەرنى تېرىپ ئەخلەت ساندۇقىغا تاشلىدى؛ يول بويىدىكى دۇكاندارلار بىلەن بىر- بىرلەپ سالاملىشىپ، ئىشىك ئالدىغا دۆۋىلەپ قويۇلغان نەرسە- كېرەكلەرنى يىغىشتۇرۇۋېتىشنى تاپىلىدى. روشەنگۈل ئۇلارغا: ھازىر ئۈرۈمچى شەھىرى «مەدەنىي شەھەر» بەرپا قىلىۋاتقان ئاچقۇچلۇق مەزگىل، قىلچە بىپەرۋالىق قىلىشقا بولمايدۇ، دېدى.

  ئىككى ھەپتە ئىلگىرى، ۋاڭ يايىڭنىڭ كىچىك ئوغلى ما جىڭخۈي كېسەل سەۋەبىدىن قازا قىلغانىدى. روشەنگۈل ئۇ كۈنى مومايغا ياردەملىشىپ ئاخىرەتلىك ئىشلارنى بىر تەرەپ قىلدى. روشەنگۈل ما جىڭخۈينىڭ يەتتىسى بېرىلگەن كۈنى خىزمىتى ئالدىراش بولغانلىقتىن ۋاڭ يايىڭنى يوقلىيالمىغانىدى. ياشانغاندا پەرزەنتىدىن ئايرىلىپ قېلىش نەقەدەر ئازاب، موماي قانچىلىك ئازابلىنىۋاتقاندۇ، دەپ ئويلاپ خاتىرجەم بولالماي، بۈگۈن چۈشتىن بۇرۇن ئالدىراشلىق ئىچىدىن ۋاقىت چىقىرىپ موماينى يوقلىدى.

  روشەنگۈل ئۇنىڭ ئىشىكىنى چېكىپ: موما، بارمۇسىز؟ دېيىشى بىلەن ئىشىك ئېچىلدى، ۋاڭ يايىڭ روشەنگۈلنىڭ قولىنى تۇتقىنىچە، كۆزىگە ياش ئېلىپ گەپمۇ قىلالمىدى.

  روشەنگۈل موماينى يۆلەپ ئولتۇرغۇزۇپ، ئۇنىڭ قولىنى چىڭ تۇتقان ھالدا: موما، كەچۈرۈڭ، يېقىندىن بۇيان بەك ئالدىراش بولۇپ كېتىپ، سىزنى يوقلاپ كېلەلمىدىم، كۆڭلىڭىزنى يېرىم قىلماڭ، مانا مەن كەلدىمغۇ، دېدى.

  ۋاڭ يايىڭ ئۆزىنى سەل توختىتىۋالغاندىن كېيىن، مۇخبىرلارغا: روشەنگۈل شۇجى مېنى ئۆز تۇغقىنىدەك كۆرىدۇ. ئوغلۇم ئاغرىپ يېتىپ قالغان بىر نەچچە يىلدا، ئۇ بىزگە تۆۋەن تۇرمۇش كاپالەت پۇلى ۋە تۆۋەن ئىجارىلىك ئۆي ئىلتىماس قىلىپ بەردى. ئۇ ھەر قېتىم ئۆيىمىزگە كەلگەندە، مەندىن يەنە قانداق قىيىنچىلىقىڭلار بار، دەپ سوراپ تۇرىدۇ. يېقىنقى بىر مەزگىلدە ئۇ بەك ئالدىراش بولۇپ كېتىپ، ئۆيىمىزگە ئانچە كۆپ كېلەلمىدى، ئوغلۇم سەكراتقا چۈشۈپ قالغاندا شۇجى روشەنگۈلنى كۆرگۈسى كەلگەنلىكىنى، ئۇنىڭ نېمە ئۈچۈن كەلمىگەنلىكىنى سورىغانىدى، دېدى يېشىنى سۈرتۈپ تۇرۇپ.

  ۋاڭ يايىڭنىڭ يېنىدا ئولتۇرغان روشەنگۈل توختى كۆز يېشىنى توختىتالمىغان ھالدا مۇنداق دېدى: موما، ئوغلىڭىز كەتكەن بولسا مانا مەن بار، مەھەللە بار، مەن ئورۇنلاشتۇرۇپ قويدۇم، بۇنىڭدىن كېيىن ئۆيىڭىزنى مەھەللە كادىرلىرى ئائىلىلەرگە كىرگەندە ئارام ئالىدىغان ئورۇن قىلىپ بېكىتتىم، سىز بىلەن كۆپرەك بىللە بولۇپ، مۇڭدىشىپ تۇرىمىز.

  بۇنداق مەنزىرە روشەنگۈل توختى مەھەللىگە خىزمەتكە كەلگەندىن بۇيان ھەر كۈنى دېگۈدەك كۆرۈلۈپ تۇردى. ئۇ: ئاھالىلەر بىزنى ئاساسەن ئۇششاق- چۈششەك ئىشلار بىلەن ئىزدەيدۇ، مەھەللە خىزمىتىنى ياخشى ئىشلەش ئۈچۈن، چوقۇم ئاھالىلەرنىڭ نۇقتىسىدىن چىقىپ تۇرۇپ، ئۇلارنى كۆپرەك ئويلىشىمىز كېرەك، دېدى.

  بۇ يىل 53 ياشقا كىرگەن روشەنگۈل توختىنىڭ مەھەللىدە ئىشلەۋاتقىنىغا 15 يىل بولدى، ئۇ ئىلگىرى- كېيىن بولۇپ بىر نەچچە مەھەللىدە ۋەزىپە ئۆتىدى. 2014- يىلى ئوتتۇرا ئاسىيا جەنۇبىي يولى كوچا باشقارمىسى گۇاڭجۇ كوچىسى مەھەللىسى قۇرۇلغاندا، روشەنگۈل توختى مەھەللە پارتىيە ياچېيكىسىنىڭ شۇجىسى بولدى. ئۈچ يىلدىن بۇيان، ئۇ تەۋەلىكتىكى نەچچە ئون كارخانا، كەسپىي ئورۇن، 100دىن ئارتۇق دۇكان، 1139 ئائىلىدىكى 2380 ئاھالىنىڭ ئەھۋالىنى بەش قولدەك پىششىق ئىگىلىدى.

  مۇخبىرلار روشەنگۈل توختىدىن: شۇنچىۋالا كۆپ ئەھۋالنى قانداق ئىگىلەپ بولالىدىڭىز؟ دەپ سورىغاندا، ئۇ: بۇ ئاسان، ئامما ئارىسىغا چوڭقۇر چۆكۈپ، ئۇلارغا تەدرىجىي يېقىنلاشتىم، دېدى.

  روشەنگۈل توختى ئون نەچچە يىللىق مەھەللە خىزمىتى تەجرىبىسىگە تايىنىپ، بىر يۈرۈش باشقۇرۇش ئۇسۇلىنى يەكۈنلىدى. ئۇ بولسىمۇ ئوبراز تۇرغۇزۇش، مۇقىملىقنى قوغداش، ئاممىغا قولايلىق يارىتىش، ئاھالىلەرگە يېقىنلىشىش، ئاجىزلارنى يۆلەش، ئۆزىنى باشقىلارنىڭ ئورنىغا قويۇپ پىكىر قىلىش، قىزغىن ياردەم بېرىش، تېز بىر تەرەپ قىلىشتىن ئىبارەت.

  روشەنگۈل توختى مۇنداق دېدى: بۇ ئۇسۇلدا مەھەللە خىزمىتى ئاھالىلەرنى مەركەز قىلىپ قانات يايدۇرۇلۇپ، ئاھالىلەر مەھەللىنىڭ تۈرلۈك خىزمەتلىرىنىڭ يادروسى قىلىنغان، بۇنىڭ بىلەن نىشان ۋە يۆنىلىش ئايدىڭلىشىپ، خىزمەتلەرنى ئىشلەش ئاسانغا توختايدۇ.

  روشەنگۈل توختى يەكۈنلىگەن خىزمەت ئۇسۇلى بويىچە مەھەللە خىزمىتىنى تەرتىپلىك قانات يايدۇرۇپ، ياخشى ئەمەلىي ئۈنۈمگە ئېرىشتى. مۇشۇ ئاساستا، گۇاڭجۇ كوچىسى مەھەللىسىدە يەنە «روشەنگۈل ئىشخانىسى» قۇرۇلدى، بۇ ئىشخانا كوچا باشقارمىسى ۋە مەھەللىدىكى ئاساسىي قاتلام كادىرلىرىنى تەربىيەلەش بازىسى قىلىنىپ، روشەنگۈل توختىنىڭ خىزمەت ئۇسۇلى كەسپىي تەربىيەلەش، تەجرىبە ئالماشتۇرۇش، ئەمەلىيەت جەريانىدا يېتەكلەش قاتارلىق ئۇسۇللار ئارقىلىق ياش پارتىيە ئەزالىرى ۋە مەھەللە كادىرلىرىغا ئۆگىتىلدى.

  روشەنگۈل توختى خىزمەت خاتىرىسىگە، شىڭچېڭ گۈللۈكى شاڭجۇ مەھەللىسىدىكى بىر ئېغىز بىكار ئۆينى «پارتىيە ئەزالىرى پائالىيەت ئۆيى» قىلىپ قۇرۇپ چىقىمىز، دەپ خاتىرىلەپ قويدى.

  روشەنگۈل توختى مۇنداق دېدى: شىڭچېڭ گۈللۈكىدە پېنسىيەگە چىققان پارتىيە ئەزالىرى خېلى كۆپ، مەھەللە پارتىيە ياچېيكىسى پارتىيەنىڭ ئاساسىي قاتلام تەشكىلاتى بولۇش سۈپىتى بىلەن، پېنسىيەگە چىققان پارتىيە ئەزالىرىغا ياخشى مۇلازىمەت قىلىشى، ئۇلارنى ياخشى تەربىيەلىشى، ياخشى باشقۇرۇشى كېرەك. ھازىر شاڭجۇ مەھەللىسى ۋە ئومۇمىي مۈلۈكچىلىكتىن باشقا كارخانىلاردا ئاساسىي جەھەتتىن پارتىيە تەشكىلاتى قۇرۇلدى، پارتىيە قۇرۇلۇشى خىزمىتى مەھەللە خىزمىتىدە يېتەكچىلىك قىلىش، كاپالەتلەندۈرۈش رولىنى ئوينىدى.

  بۇنىڭدىن سىرت، روشەنگۈل توختىنىڭ تەشەببۇسى بىلەن، گۇاڭجۇ كوچىسى مەھەللىسى «پارتىيە قۇرۇلۇشى +» خىزمەت ئەندىزىسى ئۈستىدە ئىزدىنىپ، خەلق تۇرمۇشىغا مۇلازىمەت قىلىش، مىللەتلەر ئىتتىپاقلىقى، ئۈلگە كۆرسىتىپ يېتەكچىلىك قىلىش، تەرەققىياتتا يېڭىلىق يارىتىش قاتارلىق ئون تۈرلۈك خىزمەتنى پارتىيە قۇرۇلۇشى خىزمىتى سىستېمىسىغا كىرگۈزدى.

  روشەنگۈل توختى مۇنداق دېدى: «توردىكى مىكرو مۇلازىمەت» گۇاڭجۇ كوچىسى مەھەللىسىنىڭ «پارتىيە قۇرۇلۇشى+» خىزمەت ئەندىزىسىدىكى يارقىن نۇقتىلارنىڭ بىرى. «مىكرو مۇلازىمەت»تە توردىكى e ياچېيكىسى، مىكرو سىن، مىكرو بازار، مىكرو جامائەت پاراۋانلىقى، مىكرو باشقۇرۇش قاتارلىق ئۇسۇللار قوللىنىلىپ، يان تېلېفون، ئۈندىدار، ئالاقە تورى قاتارلىق ۋاسىتىلەر ئارقىلىق مەھەللە مۇلازىمەت خىزمىتى ئاھالىلەرنىڭ كۈندىلىك تۇرمۇشىغا يەنىمۇ سىڭدۈرۈلۈپ، كۆپچىلىكنىڭ ئۆيدىن چىقماي تۇرۇپلا تور ئارقىلىق مەھەللە مۇلازىمىتىدىن بەھرىمەن بولۇشىغا شارائىت يارىتىپ بېرىلدى.

  يېقىنقى يىللاردىن بۇيان، روشەنگۈل توختى ئىلگىرى- كېيىن بولۇپ «مەملىكەت بويىچە ئىش ئورنىدا لېي فېڭدىن ئۆگىنىش ئۈلگىسى»، «ئاپتونوم رايون بويىچە ئەڭ گۈزەل شىنجاڭلىق»، «ئاپتونوم رايون بويىچە مىللەتلەر ئىتتىپاقلىقى- تەرەققىياتىدىكى ئۈلگە»، «ئۈرۈمچى شەھىرى بويىچە مۇنەۋۋەر كومپارتىيە ئەزاسى» دېگەن شەرەپلەرگە ئېرىشتى، بۇ يىل شەرەپ بىلەن پارتىيە 19- قۇرۇلتىيىنىڭ ۋەكىلى بولۇپ سايلاندى.
مەنبە: شىنجاڭ گېزىتى 
[an error occurred while processing this directive]
[an error occurred while processing this directive]
[an error occurred while processing this directive]
نادىر ناخشا – مۇزىكىلار
تور بېتىمىزدىكى يېڭىلىقلار
رادىيو دىراممىسى
بۇ بەتنىڭ نەشىر ھوقۇقى شىنجاڭ خەلق رادىيو ئىستانسىسىغا تەۋە
ئالاقىلىشىش نومۇرى: 2571553، 2578492
ئادرىسىمىز: ئۈرۈمچى شەھىرى ئىتتىپاق يولى 830- نومۇر شىنجاڭ خەلق رادىيو ئسىتانسىسى تور مەركىزى